ଗଲା କାଟି ଯୁବକଙ୍କୁ ହତ୍ୟାଲାଞ୍ଜିଗଡ଼, ନିଜ ଘର ଦୁଆର ମୁହଁରେ ଅଧ ରାତିରେ ସୋଇଥିବା ବେଳେ ନିର୍ମମ ଭାବେ ହତ୍ୟା କରାଯାଇ ଥିବା ଘଟଣା ଅଂଚଳରେ ଚାଂଚଲ୍ୟ ସୃଷ୍ଟି କରିଛି । ଏହି ଲୋମ ହର୍ଷଣକାରି ଘଟଣା ଘଟିଛି ଲାଞ୍ଜିଗଡ଼ ବ୍ଲକ ର ସିମିଲିଭଟା ଗାଁରେ ।ଗତ ୧୮ ତାରିଖ ରାତିରେ ଖାଇ ସାରିବା ପରେ ଦୁଆରେ ଶୋଇଥିବା ଅବସ୍ଥାରେ 32 ବର୍ଷ ର ନୀଳମଣି ଦଣ୍ଡସେନାଙ୍କୁ କେହି ଅଜଣା ଦୁର୍ବୁତ୍ତ ଧାରୁଆ ଅସ୍ତ୍ରରେ ଗଲା କାଟି ହତ୍ୟା କରା ଯାଇଥିବା ଜଣା ପଡ଼ିଛି ।ଉକ୍ତ ରାତିରେ ସେ ଓ ତାଙ୍କ ସ୍ତ୍ରୀ ଚଂଚଳା ଖାଇପିଇ ସୋଇଥିବା ବେଳେ ଗରମ ଲାଗୁଥିବାରୁ ନୀଳମଣି ଏକାକୀ ଦୁଆରେ ଶୋଇ ଥିଲା ।ନିଶବ୍ଦ ରାତିରେ ଏକାକୀ ସୋଇଥିବା ଜାଣି କେହି ଦୁର୍ବୁତ୍ତ ଧାରୁଆ ଅସ୍ତ୍ର ରେ ଗଲା କାଟି ଦେଇ ଥିଲା । ରାତିରେ ହତ୍ୟା କରାଯାଇ ଥିବା ବେଳେ ସକାଲୁ ଉଠି ଚଂଚଳା କାନ୍ଦ ବୋବାଳି କରିବାରୁ ପାଖ ପଡୋଶୀ ମାନେ ଆସି ପୋଲିସ୍ କୁ ଖବର ଦେବାରୁ ଘଟଣାସ୍ଥଳରେ ଲାଞ୍ଜିଗଡ଼ ଥାନା ଅଧିକାରୀ ସତ୍ୟା ନନ୍ଦ ପାତ୍ରଙ୍କ ନେତୃତ୍ୱରେ ପୋଲିସ ପହଂଚି ଛାନଭିନ ଆରମ୍ଭ କରିଛି । ଏହା ସହିତ ହତ୍ୟା କାଣ୍ଡର ରହସ୍ୟ ଉନ୍ମୋଚନ ପାଇଁ ଭାବାନିପାଟଣାରୁ ସାଇଣ୍ଟିଫିକ ଟିମ ମନୋଜ କୁମାର ମାଝୀ ଙ୍କ ନେତୃତ୍ୱରେ ଆସି ଘଟଣାସ୍ଥଳରେ ପହଂଚିବା ବେଳେ ରାୟଗଡା ରୁ ସନ୍ଧାନୀ କୁକୁର ପ୍ରଦୀପ କୁମାର ବାରିକଙ୍କ ନେତୃତ୍ୱରେ ଆସି ତଦନ୍ତ ଆରମ୍ଭ କରି ଥିବା ଜଣା ପଡ଼ିଛି ।ଏ ନେଇ ଲାଞ୍ଜିଗଡ଼ ଥାନାରେ ଏକ ମାମଲା ରୁଜୁ କରାଯାଇଛି । ସୂଚନା ଯୋଗ୍ୟ, ମୃତ ନୀଳମଣି ଲାଞ୍ଜିଗଡ଼ର ସ୍ଥାୟୀ ବାସିନ୍ଦା ହୋଇଥିବା ବେଳେ ଗତ ୧୪ ବର୍ଷ ହେବ ଅନ୍ୟ ଜାତିର ଜଣେ ଝିଅକୁ ପ୍ରେମ ବିବାହ କରି ସିମିଳିଭଟାରେ ରହୁଥିଲେ । ତାଙ୍କର ଦେଢ଼ ବର୍ଷର ଏକ ଶିଶୁ କନ୍ୟା ମଧ୍ୟ ଅଛି ।ବର୍ତମାନ ପୋଲିସ ତଦନ୍ତ ଆରମ୍ଭ କରିଥିବା ବେଳେ ହତ୍ୟାକାଣ୍ଡର ପର୍ଦାଫାସ କରିବା ସହିତ ଘଟଣାରେ ସଂପୃକ୍ତ ଦୁର୍ବୁତ୍ତଙ୍କ ବିରୁଦ୍ଧରେ ଦୃଢ଼ କାର୍ଯ୍ୟାନୁଷ୍ଠାନ କରିବା ପାଇଁ ଅଞ୍ଚଳବାସୀ ଦାବି କରିଛନ୍ତି ।